شعر أحمر، ابتسامة جميلة، حقيبة مليئة بمستحضرات التجميل ولمسة تأثيرها كالسحر. لميرنا نصر طريقتها الخاصة بإبراز جمال ملامح كل فتاة، لتعزز ثقتها بنفسها وتجعل ابتسامتها “أحلى” ميرنا خريجة اختصاص صيدلة، يمكننا القول أن ميرنا تستطيع الأهتمام بالشخص من الداخل والخارج. ميرنا كانت المسؤولة عن جمال جلسة التصوير الأخيرة لمجلة فيلم فير الشرق الأوسط في فندق باب شمس، حماسها وطاقتها جعلت تبدو ساعات الفجر الأولى أكثر حيوية! حنان يحيى ملازم تسأل خبيرة الماكياج ميرنا نصر عن سبب دخولها لهذا المجال، ما الماكياج بالنسبة لها ونصائح للعناية بالبشرة. مقتطفات…
من الصيدلة إلى عالم الماكياج، ما الذي دفعكِ للدخول إلى عالم الجمال؟
حبي وشغفي للجمال والالوان هو يلي خلاني ما ابعد عن هالمجال اصلاً حتى وانا عم ادرس بمجال الطب ، بطبعي انسانة بحب الجمال بانواعه وبحب الناس يلي بتهتم بحالا وتبان ب احلى طلة. عندي هالهواية والشغف للالوان والمكياج وهذا يلي خلاني حتى بعد ما درست صيدلة انو اتعمق اكتر بمجال التجميل واحصل على شهادات احترافية فيه.
ما هي إطلالة الماكياج التي تُفضلينها أكثر؟ الإطلالة ذات الألوان الداكنة أم الهادئة ولماذا؟
الاثنين.. انا انسانة مابحب الروتين .. بحب التميز دايماً .. وكل لوك الو وقته المناسب لهيك مرات اللوك الهادي بيكون بيجنن ومرات اللوك البولد بيكون روعة.. تناسقًا مع اللبس والشعر والاكسسوار وحتى مع مود ومزاج الصبية.
برأيكِ كخبيرة ماكياج، هل ترين أن عالم الماكياج سيتطور أكثر؟
اكيد.. متل اي شي تاني موجود كلو بيتطور ودايما منشوف اشياء متجددة ومتنوعة . الجمال والتجميل بعمرو ما بيكون الو حدود.
كيف تحططين للماكياج الذي ستطبقينه على المودل؟
باخد بعين الاعتبار عدة اشياء متل شو هو ذوق الصبية، تسريحة الشعر واكيد اللبس لحدد اللوك الكامل. اما بالنسبة للمكياج حصراً ف اختياري لشكل المكياج ونوع المكياج والالوان يلي بعتمدها بتطلع على ملامح الوجه وتقاسيمه سواء كان وجه بيضاوي مربع او دائري وشو بيناسبه، شكل وحجم ولون العيون ، وبالاضافة اكيد لون بشرتها وال undertone.
هل برأيكِ العناية بالبشرة مرتبطة بالحصول على ماكياج نهائي أجمل؟
اكيد، البشرة الصحية هي اساس المكياج الحلو والنظيف. ودائماً الداخل بينعكس ع الخارج، مثلاً فيني شبهلكن ياها بلوحة “كانفس” كل ماكانت اللوحة نضيفة ومافيها اي شوائب واضرار بتطلع اللوحة والالوان بالاخر روعة !
ما هي نصائحكِ الخاصة بالعناية بالبشرة؟
متل ما حكيت مسبقاً الداخل بينعكس ع الخارج ، لهيك مهم كتير نشوف جسمنا بالاول شو بيحتاج من عناصر غذائية وصحية لنحصل على بشرة خالية من العيوب والشوائب. اكيد ياكلو اكل فيه عناصر غذائية مفيدة وسوائل كتير متل الفواكه، ويكترو من شرب الماء لانه هو اساس البشرة الصحية الصافية والمشرقة، اما بالنسبة للعناية الخارجية ف دائماً بنصح بتنضيف البشرة بشكل يومي( مرتين باليوم ) وبالأخص لازالة المكياج والافرازات الدهنية والشوائب، ثم اكيد الترطيب لجميع انواع البشرة كعناية نهارية وليلية باستخدام السيروم والكريمات والزيوت المغذية للبشرة.
برأيكِ، ما هو أهم شيء في الماكياج أو الإطلالة بشكل عام؟
سؤال صعب ، كل قطعة بالمكياج الها دورها الخاص لتضيف لمسة مختلفة ومميزة عاللوك. بس لو لازم اختار ف بختار الروج “الحمرا” لانو بتعطي لون وحيوية وبتنور الوجه واللوك كاملاً.
ما هي النصيحة التي يمكن أن تقديمها لأي فتاة ترغب بالدخول إلى عالم الماكياج؟
اولاً ماتوقف ممارسة وتعليم ابداً، تضل عم تتعلم دايماً وتمارس العمل والمهنة بشكل مستمر. و ما تسمح للناس حولها تأثر عليها بالكلام السلبي وما توقف ابداً عن حلمها. تشتغل عنفسها لتعمل شي مختلف ومميز عن الباقي وتكون الها هويتها وبصمتها الخاصة.
إذا فتحنا حقيبة ميرنا، ما الذي سنعثر عليه؟
الحمررررااا “الرووج”
أخبرينا عن تجربتك مع فيلم فير الشرق الأوسط بآخر جلسة تصوير وكيف قمتِ بمفردك بالاهتمام بإطلالة ثلاثة مودلز؟
بصراحة كانت تجربة جداً رائعة ، كان تحدي جميل، انه كون المسؤولة عن ٣ موديلز مع بعض وأعمل ٦ لوكات مختلفة ب وقت ضيق و هو وقت شروق الشمس، اعتمدت فيه على اللوكات الناعمة والبسيطة ليتناسب مع ملامح الموديلز وبعدين تم التعديل بالميك اب واضافة لمسات لتقوية اللوك واعطائه طابع مختلف واقوى. والحمدلله كانت جلسة التصوير ناجحة ورائعة باللوكات والموديلز وطاقم التصوير واكيد فريق المجلة الجميل.
Some of her magic
From the shoot
You can find her on instagram: